Жүдогийн сэргэн мандал

Японд JUDO RENAISSANCE гэсэн үг байдаг. Монголчилвол "Жүдогийн сэргэн мандал" гэхэд болох байх. 2001 оноос Японы жүдогийн холбоо, Коодоокан(Коодоокан гэж чухам юу болох талаар монгол викигээс хараарай) хамтран хэрэгжүүлж эхэлж буй төслийн нэр.

Зорилго нь жүдог үндэслэгч Каноо багшийн анх эхлэн жүдог зохиосон үеийн зорилго, хүнийг сурган хүмүүжүүлэх арга барилын дахин ухамсарлахын тулд
1. Жүдогоор хичээллэгч хүний моралийн төвшинг ахиулах
2. "Хүн"ийг бүтээх жүдог дэлгэрүүлэх
гэсэн асуудлуудад төвлөрөн ажиллаж байгаа юм. Одоогоор бага дунд сургуулиуд болон орон нутгуудад өргөнөөр хэрэгжиж байгаа бөгөөд үүнийг хэрэгжүүлэхийн тулд
- Хүнтэй мэндчилэхдээ "Сайн байна уу" гэж цоглогоор эхлэцгээе.
- Хогийг хогийн саванд нь л хая, үгүй бол сэтгэл зүрхээ гээж байгаагаас өөрцгүй шүү
- Найз гэдэг бол нэг амьдралын үнэт зүйл шүү, үргэлж хайрлан хүндэтгэж харицацгаая
- Хэн нэгэн туслалцаа эрэлхийлж байгаа хүн ойрхон байвал зориг гарган туслацгаая
- "VIVA! JUDO"-г　дэлхий дахинд дэлгэрүүлцгээе!

Үүнийг харахад жүдо гэдэг бол зөвхөн спорт биш, өөр илүү гүн ухааны утга агуулга бий шүү гэдгийг улам ихээр мэдрэх юм. Японд одоо ихэнх жүдогийн дэвжээнд хадаастай байгаа ханын зургаар өнөөдрийн бичлэгийг өндөрлөе дөө.


Монголд маань ч гэсэн "Жүдогийн сэргэн мандал" улам өргөн дэлгэрэх болтугай.

Олимпод оролцохын тулд...

Хаяа хаяа бичиж буй эзэн нь хүртэл мартах шахдаг блогт маань цаг саатан уншиж буй таньд " Шинэ оны халуун мэндийг дэвшүүлээд олз омог ихтэй баяр баяслаар дүүрэн он болох болтугай " гэж хүсье.
Дээрээс хойш хальт оруулчъя гэж бодож байсан нэг сэдэв бичихээр шийдлээ. Жүдогоор олимпийн эрх хэрхэн авдаг болсон талаарх шинэ дүрмийн талаар товчхон танилцуулая.
Үндсэн 3 том өөрчлөлт орсон.
1. 2008 оны 10 сарын 21-нд шинэчлэн тогтоосон дүрэмд зааснаар заагдсан тодорхой тэмцээнүүд дэх амжилтаар нь тамирчдыг эрэмблэх систем юм. Олимп хүртэлх 4 жилийн хугацаанд дахь хамгийн өдөр амжилт гаргасан 4 тэмцээний дүнгээр эрэмб тогтоож, эрэмбийн дарааллаар эхний эрэгтэй 22, эмэгтэй 14 тамирчинг нэг улсаас эсвэд нэг бүсээс нэг тамирчинг сонгох гэсэн системд шилжиж байгаа юм. Өдийг хүртэлх систем нь эрх авсан жингийнхээ тамирчинг өөрсдөө сонгодог байсан бөгөөд 4 жилийн турш байнгийн тэмцээнд оролцож тогтмол амжилт үзүүлэхгүй байсан ч гэсэн олимпод орж болдог байсан бол одоо энэ нь бэрхшээлтэй зүйлийн нэг болов. Заагдсан тэмцээнүүд гэдэгт нь ДАШТ, Мастеруудийн АШТ,4 Гранд Слим, 5 Гран при болон Дэлхийн цомийн АШТ гэсэн дарааллаар оноо тооцогдоно.
2. Мэхийн үнэлгээнээс "коока" үнэлгээг халж байгаа явдал юм. Энэ нь цэвэр ялалт буюу иппон үнэлгээгээр өрөлдөгчөө ялахын тулд тамирчдыг шамдуулах, нийт тэмцээний цагийг хэмнэх(идэвхигүй өрсөлдөөнгүй барилдааныг багасгах)ийн тулд хийж буй өөрчлөлт аж.
3. Олон улсын жүдогийн холбооний удирдах зөвлөл нь 11 хүнтэй байсныг 20 хүнтэй болгож хүрээг нь тэлжээ.
Ерөнхийдөө голф болон газрын теннисний эрэмбийн системийг үндсээ болгосон шинэ эрэмбийн систем нь энэ өвлийн ОУ тэмцээнүүдээс эхлэн албан ёсоор эхэлж байгаа билээ.

Олимпын аврага жүдочин барилдахаа болино

Саяхан болоод өнгөрсөн Бээжингийн зуны олиммын наадмын шуугиан саяхан болтол үргэлжилсэн болов уу. Миний хувьд ч түрүү болоо хоногт л гэхэд анхны алт авсны төлөө гээд хундага тулгаж найз нартайгаа ганц нэг пивоны лааз хоослосондоо.
Олимпод амжилт гарсасан тамирчид ч гэсэн чих нь амсхийж дараагийн тэмцээн уралдаандаа бэлдэж эхэлж байна.
Нэгэн сонирхолтой мэдээ дуулгавал Бээжингийн олимпод үнэмлэхүй жинд алтан медалийн эзэн болсон Ишии Сатоши(1986.12.19нд төрсөн) жүдо барилдахаа болиж байгаа юм байна. Гэхдээ зодог тайлж байгаа юм биш, спортын ертөнцөд бол цаашдаа үргэлжлүүлэн "тулалдах" болжээ. Юу гэхээр японоор "соогоокакүтооги" буюу махчилбал "Нийлмэл(ерөнхий) тулаан"-ы урлагт хүч үзэхээр шийджээ.

Тэрээр энэ сарын 3нд хийсэн хэвлэлийн бага хурал дээр
"Бага байхын л хамгийн хүчтэй хүн болохыг мөрөөдсөн. Мэдээж эргэлзэх зүйл бол бий. Өөртөө л хамгийн зөв гэж бодож нийлмэл тулааны урлагийг сонгосон" гэж ярижээ. Нийлмэл тулааны урлагийн талаар товчхон тайлбарлавал "Гар, хөлөөр цохих, өчих, боох,бөхийн мэх хийх зэрэг довлож болох бүх зүйлийг зөвшөөрдөг тулааны урлаг юм".
Орон оронд зохиогддог олон тэмцээнүүд бий. Нэгдсэн дүрэм гэж байхгүй тухайн зохиож буй улс, тэмцээнээрээ ялгаатай. Японд бол "HERO", "PRIDE" зэрэг тэмцээнүүдээр хүмүүс мэдэх болуу. Монголчуудаас бол аврага Сумьяабазар маань 2 ч удаа нийлмэл тулааны урлагийн дэвжээнд зодоглосон. Мөн "Чингисийн цавчилт" хэмээх мэхээрээ алдартай Нарантунгалаг ч энэхүү нийлмэл тулааны урлагт хүч үзсэн билээ.
Ишии Сатошиг ийм шийдвэр гаргасанд ихэнх хэвлэл мэдээллийнхэн шоу ертөнцийнхөн уриалгахан хүлээж авч байлээ. Түүний хичээнгүй шантрагшүй зан нь амжилтанд хүргэх нь мэдээж байх. Миний хувьд бол шинэ залуу од нь байхгүй болж, жүдогийн ертөнцөд л томоохон гарз гарлаа даа гэж бодож байна.
Дэлхийн хэмжээнд японы сонгодог "柔道（жүдо）" олигтой амжилт гаргахгүй болж, зөвхөн ялахын төлөөх барууны стилийн "JUDO" хөгжиж байгаа нь ч Ишии Сатошиг ийм шийдвэр гаргахад нөлөөлсөн болов гэж таамаглаж байгаа.
Тодруулга: Нийлмэл тулааны урлагийг нохой зодоон гэх хүмүүс байдаг. Миний хувьд бол зодоон биш урлаг гэж ойлгож байгаа. Тэгээд ч анхлан "нохой зодоон" гэж гэрлэгдэж байсан зүйл бол нийлмэл тулааны анхны үндэс гэж хэлж болох "pro wrestling буюу мэргэжлийн бөх" юм. Үндсэндээ бол жинхэнээсээ зодолдож ялах биш жүжигчилсэн үзүүлбэр байдгаараа онцлог.

Сайхан мэдээ

Япон улсын бүх их дээд сургуулиудын аврага шалгаруулах эрэгтэйчүүдийн 27 дахь эмэгтэйчүүдийн 24 дэх тэмцээн өнгөрөгч долоо хоногийн сүүлээр болж өнгөрөв.
Жил болгон л болж өнгөрдөг. Үе үеийн жүдогийн хүчтэнгүүдийн дайрч гардаг тэмцээн.
Харин энэ жил их онцлогтой. Юу гэхээр энэ удаагийн 100кг-н жинд "Нихон" их сургуулийн 1-р курсын оюутан Баттулгын Тэмүүлэн гэж монгол залуу түрүүлэв.



"Тэмүүлэн ахлах сургуулиудын биеийн тамирын спартакиадын нээлтэнд тангараг өргөж байгаа нь"

4 жилийн өмнө Японы Ишикава мужид байрлах "Японы нисэхийн 2-р дунд сургуулид ирж суралцан жүдогоор хичээллэж байсан тэрээр одоо 19 настай бөгөөд түрүүлсний дараа ярилцлага өгөхдөө "Маш их баяртай байна. Толгой ажиллуулж мэх уралдуулан барилдах хэрэг гардаг болохоор бөх дундаас жүдод хамгийн дуртай. Сүкүйнагэ буюу хийсэн мэхнийх нь хийг нь тааруулж хийдэг мэхэнд гаргуун. Японд жүдод суралцан цаашлаад олимпын аврага болохын төлөө эрмэлзэнэ" гэжээ. Тэрээр дунд ангидаа монгол бөх болон жүдогийн төрлөөр улсын аврага болж байсан юм байна. Одоо тэрээр "Нихон" их сургуулийн Боловсролын тэнхимийн 1-р курсын оюутан.



"Жүдогийн дугуйланд Тэмүүлэнтэй хамт шинээр орж буй 1-р курсынхан"
"Нихон" их сургууль нь эртний түүхтэй томоохон хувийн их сургуулиудын нэг юм.
Юутай ч гэсэн нэгэн Монгол хүү жүдогийн эх өлгий болсон японы дэвжээнд нэрээ дуурсгаж чадлаа. Дэлхийн дэвжээнд тун удахгүй нэр дуулдах байх гэж хүлээж байяа.
Тамирчны алдар бадартугай.

Тошихико Кога гэж хэн бэ?

Ахыгаа даган бага сургуулийн нэгдүгээр ангиасаа эхлэн жүдогоор хичээллэсэн тэрээр одоо бол жүдо сонирходог хүн бүрийн мэддэг хүн билээ.


Мэхийн олон төрөл түүн дээрээ мэх бүрийн хувилбар хослолыг хийхээс гадна өөрөө зохиож ирсэн нь "Хэйсэйгийн Саншироо" гэж нэрлэгдэхэд хүргэжээ. (Хэйсэй гэдэг нь японы тоолол бөгөөд 1989 оноос одоо үргэлжилж байгаа. Томита Цүнэогийн нэрт зохиол "Сүгата Саншироо"-н Саншироотой дүйцүүлжээ. Дашрамд хэлэхэд Саншироо нь Сайгоо Широо хэмээх бодит хүний дүр)
Кога нь 1967 онд Япон улсын өмнөд хэсэгт байрлах Кюүшюү арлын Сага мужад төржээ. Жүдогийн хар бүс 7-р дантай.Барселон зун олимп алтан медал, Дэлхийн 3 удаагийн аврага (1989, 1991, 1995). Үнэхээр ид үедээ юу хийх нь мэдэгдэхгүй, өмнөх тэмцээн дээр хийж байсан мэхийг нь хамгаалах мэх бодож бэлдээд ирэхээр түүнийг нь хариулах мэх бодож зохиогоод л гол нь тэр мэхээ амжилттай хэрэглэдэг байсан нь Когагийн хэр хөдөлмөр бүтээлч болохыг илтгэнэ. Түүний амьдралын уриа нь "Хэзээ ч бууж өгч мохохгүй байх" юм. Барселоны олимпын тэмцээнээс хэдэн хоногийн өмнө өвдгөндөө бэртэл авсан тэрээр "Хэрвээ би тэнд за одоо ингээд өнгөрсөн дууссан гэж бодсон бол л медал байтугай нэг ч ялалт авч чадахгүй байсан" гэж ам бардам ярьж байхыг нь бичигч миний бие яг хажууд нь сууж байгаад сонсож байж билээ. Азтай миний бие Кога гуайг зодог тайлсных нь дараа байсан ч гэсэн энэ их хүнтэй "зодоглож үзсэн" шүү гэж одоо ч гэсэн бахархан бодож явдаг юм. Тэрээр одоо багш дасгалжуулагч хийхийн хажуугаар жүдогийн шилдэг үеийн дараа үеийг бэлдэх өөрийн гэсэн дэвжээ ажиллалуулж байгаа билээ. Мөн түүнчлэн олон сургууль тэнхимүүдэд урилгаар очиж өөрийн амьдралын замнал зэргийн талаар лекц уншин тун завгүй байдаг бололтой.
Түүний гаргуун эзэмшсэн үүрэх мэх, тэрэн дотроо нэг гарын барьцтай үеийн "Иппонзэой" үүрэх мэхний төрөл болон хувилбар, хуурч өөр мэх хийж байгаа зэргийг товчхон үзүүлсэн нэгэн бичлэг үзэв.
Таалан соёрхоно уу.

Би жүдод дуртай

Монгол түмэн маань он удаан жил хүсэн хүлээсэн олимпын аврагын алтан медалыг Монгол улсын шигшээ багийн тамирчин Найдангийн Түвшинбаяр маань авч, олимпын наадмын талбайд Монгол төрийн далбаагаа хамгийн өндөрт өргүүлж, төрийнхөө дууллыг эгшиглүүллээ. Түвшээдээ маш их баярлалаа гэж миний блогоор хааяа ч гэсэн шагайгаад гардаг зочдынхоо өмнөөс дамжуулмаар байна. Монголчуудын маань баярын өдөр болж байгаа гэдэгт эргэлзэхгүй байнаа.
Үнэхээр үнэхээр хамрын самсаа шархирч, баярын нулимс өөрийн эрхгүй бөмбөрсөн сайхан мөч байлаа. Ажилтай байсны улмаас алтан медалын төлөөх барилдаан, шагнал гардуулах ёслолыг шууд үзээгүй ч гэсэн оллоо.мн болон юүтүүбээс үзэж тун сэтгэл хангалуун сууж байна. Сайхан байнаа. Ганцаараа нэг лааз шар айраг задалж суугаад онлайнаар найз нартайгаа тулгаад л баярлаж өнгөрүүлэв.
Энэ удаагийн олимпод жүдогийн эх орон япончууд маань Афины амжилтыг давтаж чадаагүй ч(маргааш үнэмлэхүй жингийн тэмцээн байгаа)4 алт авч арга хүчтэй гэдгээ батлалаа. Сүүлийн жилүүдэд өөр оронд алдаагүй байсан эрэгтэй 60кг болон 100кг эмэгтэй 48кг-д алтан медалаа энэ жил авч чадсангүй. Дэвжээн дээрээ байгаа хятадууд ч мөн хүчтэй байлаа. Цагаанаа маань эх орондоо олимпын 2 ч эрх авч ирсэн боловч түүний хөдөлмөр талаар болж өөрөө ч гэсэн эхний тойрогт ялагдсанаар харамсалтай дуусав. Уул нь энэ жил медалынхаа өнгийг өөрчилж монголчуудаа баярлуулна гэж хүлээж байсан юм.
Юутай ч жүдочид маань мөнгөн медалаа Алт болгож буудлагынхан маань хүрэл медалаа Мөнгө болголоо. Үлдэж буй чөлөөтийнхөн болон боксынхон маань ч зүгээр өнгөрөхгүй байх шүү.

Японы тамирчидын багийн ахлагчаар Сүзүки Кэйжиг томилов

Бээжинд 2008 онд болох Зуны спортын их наадамд Японы багийг ахлан оролцох чухал үүргийг жүдогийн 100кг-ийн жингийн тамирчин Сүзүки Кэйжид оноов. Японы нийт шигшээ багийн ахлагчаар томилогдсон талаар "Франц дахь олон улсын хамтарсан бэлтгэлийн үед Сайтоо дасгалжуулагчаас сонссон. Маш их гайхсан ч хүндтэй чухал үүрэг хүлээж авлаа" гэж ярилцлага өгсөн байна. Нэгэнтээ "Chinggis Khaan Trophy"-н эзэн болж Монголчуудын маань хамгийн сайн таних тамирчин болсон гэхэд алзахгүй байх. Мэдээж тамирчных хувьд бол мундаг нь ойлгомжтой. Дээр нь энгийн үед хэлж яриж байгаа болон биеэ авч явж байгаа нь үлгэр дуурайлал болохоор хүн болохоор энэ чухал албанд сонгогдсон болов уу. Багийн тугчин нь ширээний теннисчин Фүкүхара Ай. Багаасаа ширээний теннисээр хичээллэсэн түүний талаар япон хүн болгон ам сайтай байдаг.
Дашрамд хэлэхэд өмнөх олимпд багийн ахлагчаар жүдогийн Иноүэ Коосэй, тугчингаар чөлөөтийн Хамагүчи Кёоко нар энэ чухал үүргийг гүйцэтгэсэн билээ.
Энэ удаагийн бичлэгтээ 2004 оны Афины олимпд Японы баг тамирчдын медал авсан барилдааны тоймыг толилуулая. Японы баг энэ олимпоос түүхэндаа хамгийн олон медал авсан билээ.

Бүх Японы жүдогийн аврага шалгаруулах тэмцээн маргааш

Маргааш жингийн ялгаа байхгүйгээр Бүх Японы жүдогийн аврага шалгаруулах тэмцээн Токио дахь Бүдооканд болно. Энэ удаагийн тэмцээний нэг онцлог нь нэмэх 100кг-н жинд Бээжинд болох олимпийн жүдогийн үндэсний шигшээ багт хэн эх орноо төлөөлж оролцох вэ? гэдгийн шийдэхэд чухал нөлөө үзүүлэх гэдэг байгаа юм. Энэ жингийн эрхийн төлөө Иноүэ Коосэй,Мүнэта Ясүюки, Иший Сатоши болон 100кг-д олимпийн эрхээ аваад байгаа Сүзүки Кэйжи нар өрсөлдөж байгаа билээ. Тэд өнөөдөр энэ удаагий тэмцээнд хэрхэн оролцох талаараа хэвлэлийн бага хурал хийлгэж ярилцлага өгчээ.
Жин тусад нь хийсэн шалгаруулалтанд түрүүлж ойрын үед харагдаж байгаагүй Иноүэгийн өөртөө итгэлтэй байгаа байдал, жиндээ дотоодын болон олон улсын А зэрэглэлийн тэмцээнд дандаа хамгийн өндөр тавцанг эзэрхийлж буй Мүнэта, шинэхэн од болох Ишии бэртэлтэй байж байгаад барилдаж эхлэх том тэмцээн, Сүзүкигийн хувьд урд жил олж авсан аврагын суудлаа бол хэнд ч өгмөөргүй байгаа зэрэг оч дөл бутарч, уран мэх уралдуулсан сайхан тэмцээн болох байх даа.
Маргаашийн тэмцээний мэдээг тэсэн ядан хүлээе.
Энэ удаа нэг сонирхолтой бичлэг толилуулая.
"Жүдогийн бурхан" хэмээх Мифүнэ Кюүзоо хар бүс 10-р дантын бичлэг. Таалан сонирхоно уу!

Жүдо унахын гайхамшиг

Энэ гарчгийг хараад гайхах хүн байж магадгүй. Хүн хараад сайхан юм унших сэтгэлзүйн бэлтгэлтэйгээр эхлүүлэх тийм гарчиг ихэвчлэн сонгодог л доо. Унах гэдэг үгийг эхлээд сонсоод эерэг зүйл бодох хүн ховор байх. Харин гайхамшиг гэдэг үгтэй хослуулвал тэндээс юу гарах бол гэж бодоод өнөөдрийнхөө бичлэгийн гарчгийг сонголоо.

Унахын гайхамшиг, зүгээр морь тэмээ машин тэрэгнээс авахуулаад ямар нэг зөөврийн хэрэгсэл жолоодохын унах биш шүү. Ямар нэг зүйлээс ойчих, бүдэрч унахын "унах".
Жүдо барилдаж сурах гээд анхлан их сургуулийнхаа жүдогийн клубт очоод шууд л орно гээд орчихсон. Одоо бол сайхан хөгжилтэй л үеүүд санаад орж байна. Тухайн үед бэлтгэл нь хүнд, хэцүү санагдаад бол болимоор санагдаж байсан үе бол цөөнгүй бий.
Эхний өдөр ч яахав сайхан, надад бүгдээрээ шидүүлж аль байдаг найрсаг бүхий зангаа гаргасан байх. Дараагийн өдрөөс эхлээд л нэгэнт ам өчгийг маань авчихсан юм чинь гэсэн шиг жинхэнэ жүдо гэж юу байдаг талаар лекц уншуулав. За тэгээд бие халаалт нь арай гэж эхлээд хэдэн хөдөлгөөн хам хум хийчээд л ашгүй сайхан барилдаж эхлэх нь гэтэл миний нэрийг дуудав. Шинээр эхэлж байгаа учир тусгай менюгээр хичээллэнэ гэв. Юу юм болдоо гэтэл "унаж сурах дасгал гэнэ". Японоор бол үкеми - утгачилвал биедээ хүлээж авах гэсэн үг л дээ. Урагшаа хойшоо, баруун зүүн гээд 4 янзын үкэми 50 50 удаа хий гэнэ. Өө юу байхав харахад амархан юм байна гэж бодоод л эхлэв ээ.
За даа эхний 10 дахиас эхлээд үгээ хэлж эхлэх нь тэрдээ.
Хамаг бие доргиод л алга өвдөөд л. Хүн барилдмаар байхад чинь ухааны юм бодоод л хөмхийгөө зуугаад арай гэж 30 30 хийв. За болиж үзье гээд бодож байтал ашгүй дээд курсын залуугаас нэг зөвлөгөө авч газар алгадах үеийнхээ таймингаа засав. Арай дээрдэж байна. Ийнхүү эхний өдөрч өнгөрөв. Орой нь тухтай ч унтаж чадахгүй, маргааш нь бол хичээлдээ арай хийж очин, хамаг бие хүндвэрлээд, шатаар бараг хөлөө гараараа өргөж, толгойныхоо үснээсээ татах нь холгүй өгсөж уруудаж байв.
Тэгсэн ч бэлтгэлдээ гүрийгээд очлоо. Бие хүндүүр бэлтгэл бараг хийж чадахгүй байх гэтэл, аан тэгдийн тэхдээ таслах аргагүй дээ. Өнөөдөр дахиад 50 50 удаа үкэми хийнэ шүү гэж байна. Яагаад үгүй гээгүй, яаж хийж өнгөрүүлснээ ч одоо лав санадаггүй юм.
Ийнхүү эхний хэд хоног ч "унаж" л сурч билээ.
Гэхдээ энэ нь илт мэдэгдэхгүй ч дараа дараагийн мэх болон дасгалуудын үндэс болж явсныг 2-р курст ороод шинээр оюутнууд клубт маань элсэхэд л ойлгож билээ.
Өнөөдөр гэнэт YOUTUBE-д орж жүдогийн бичлэгүүд үзмээр санагдаад нэг бичлэг олов. Үнэхээр гарамгай шилдэг мэхүүдийг үзүүлсэн гоё бичлэг. Гэхдээ сайхан ялж байгаа тамирчидыг ганцхан харах биш, ялагдаж байгаа жүдочид хэрхэн яаж унаж байгааг харвал бас гайхамшигтай.

Энэ л "Унахын гайхамшиг" юмдаа.

Жүдо бөхийн тэмцээн дээр болсон баримтат хошигнол

Жүдогийн тэмцээний үеээр дасгалжуулагч зөвлөгөө өгч байгаа нь

1. Яваад өгөөч
2. Түргэн хөдлөөч
З. Боохдоо түргэн боогооч
4. Чи яагаад байгаа юм бэ?
5. Одоо хийгээчээ
6. Бариад аваач
7. Тавиулаач
8. Сэгсрээд хийгээч
9. Араас нь сайн мордоод хий
10. Сайн тэврээд дараач
11. Урдаас нь түлхээч
12. Салтайнаас нь гараад дараач
13. Хойноос нь хийгээч
14. Бөгсөө сайн оруулаач
15. Бөгсөө хаяач

Засаж хэлбэл
1. Идэвхитэй барилд, (одоо ажилла)
2. Хөдөлгөөнтэй, золбоотой бай
З. Боох мэхний барьцанд хурдан шилж
4. Тайван, ухаантай барилд
5. Мэхээ зөв үед нь оновчтой хий
6. Эхэлж үндсэн барьцаа ав
7. Барьцаа тавиул
8. Дугтраад, тэнцвэрийг нь алдуулж байгаад мэхээ хий
9. Араар нь хууралттай давхар морд
10. Хэвтээ барилдааны үед гараа татаад цээжээрээ нааж дар
11. Өрсөлдөгч нь дайран ирэх үед гараараа түлхээд мэх хий
12. Хэвтээ барилдаанл хөлөө өрсөлдөгчдөө хавчуулсан тохиолдолд даралт болохгүй учир хөлөө ав гэсэн заавар
13. Араас нь мэхээ үргэлжлүүл, угсраа мэх хий
14. Таазаараа сайн сууж ор
15. Хөл таазаараа шидэж эргэ!
юм гэнээ. хэхэ
Д.Данзан

Жич:таалагдсан тул сонин.мн дээрээс уншиж амжаагүй хүмүүст зориулав.
Зургийн тайлбар: Дохагийн дэмжээн дэх циркчин Цагаанаа

Бүх японы жүдогийн аврага шалгаруулах тэмцээн

Блог гэж юу байдгийн мартах дөхчихсөн явж байна. Нэг л бичих боломжгүй ч юм шиг явсаар өдийг хүрлээ. Энэ хугацаанд их ч олон зүйл болж өнгөрлөө шүү.
Юутай ч сургуулиа төгсөж авсан. Хуулийн баклавр болчихсон гэхэд өөртөө ч итгэхгүй л байна. Баклавр авчаад юун сүртэй юм гэх хүн гарч магадгүй. Аргагүй шүү дээ. 25 нас хүрч байж нэг юм өөрийгөө илэрхийлэх нэрийн хуудастай болж байгаам чинь...
За тэгээд хэсэг монголдоо очиж амарч байгаад ирлээ. Удахгүй ажилчин шоргоолж болох гэж байгаа надад бол сайхан л амралт боллоо. Аав ээждээ гялайлаа. Монгол гоё байлээ шүү. Очоод л мэдрэнэ дээ.
Буцахдаа харин Японд хамтарсан бэлтгэл хийхээр явж буй жүдогийн Монголын шигшээ багийнхантай нэг онгоцоор ирсэн. Японд жүдогийн хэлд орсон надад бол мэддэг хүн нэг ч байхгүйм билээ. Зүгээр л холоос хараад мундаг юм бээ гээд бодоод хоцорсон. Уул нь хол ч биш л байсан л даа. Яг миний урд сууж байсан. Яахав бэлэг дэмбэрэлтэй зүйл боллоо гээд бодчихоё. Коодооканд очиход нь үзье гэж бодсонч хувиарийг нь мэдэхгүй болохоор... Юутай ч тэдэндээ амжилт хүсэе.

Сэдэвээсээ хазайж байна. Жүдо сонирхогчиддоо зориулав.

Японд хамгийн их хүн үзэж, хүлээж байдаг нэгэн тэмцээн удахгүй эхлэх гэж байна.


Энэ сарын 29-нд бүх Японы жүдогийн аврага шалгаруулах тэмцээн болно. Урд жилийн аврага залуухан жүдочин Ишии Сатоши, Үнэмлэхүй жинд Афинаас алт авчирсан Сүзүки Кэйжи, сүүлийн үед орсон томоохон бүх тэмцээндээ иппоноор ялж, жүдогийн ертөнцөд эргэн ирснээ харуулж буй Иноүэ Коосэй, Үнэмлэхүй жинд олон улсын тэмцээнээс дандаа алттай ирж буй Мүнэта Ясүюки зэрэг бүх одод оролцоно. 29-нд NHK тв 16:00 цагаас гарах юм билээ. Сонирхоорой. Тэгээд сэтгэгдэлээсээ хуваалцаарай.



Зурагт хуудас №1: Энэ жилийн тэмцээний зурагт хуудас
Зурагт хуудас №2: Нодлин жилийн тэмцээний зурагт хуудас